নেন' প্ৰযুক্তিৰ মূল ধাৰণা, ইতিহাস আৰু সম্ভাৱনাৰ বিষয়ে সহজ ভাষাত লিখা এই লেখাটো ২০১১ চনৰ ১৭ অক্টোবৰত প্ৰসাৰ ভাৰতী ডিব্ৰুগড়ৰ পৰা প্ৰচাৰিত এক বক্তৃতা। ১৯৬০ চনৰ SI একক প্ৰথা আৰু 'ডেচি', 'ছেণ্টি', 'মিলি', 'মাইক্ৰ'', 'নেন'' আদি পূৰ্বপদৰ ব্যাখ্যাৰে লেখকে বুজাইছে যে গ্ৰীক ভাষাত 'বামন' অৰ্থৰ নেন' শব্দৰ পৰা অহা এক নেন'মিটাৰ হ'ল এক মিটাৰৰ শত কোটি ভাগৰ এভাগ, য'ত মাত্ৰ তিনিটা পৰমাণু সজাব পাৰি। নেন' পৰ্যায়ত পদাৰ্থৰ ভৌতিক-ৰাসায়নিক ধৰ্ম সলনি হয়, আৰু অণু-পৰমাণু সজাই নতুন গুণৰ সামগ্ৰী তৈয়াৰ কৰাটোৱেই নেন' প্ৰযুক্তি; ইয়াৰ ইতিহাসত ১৯৮১ চনত এৰিক ড্ৰেক্সলাৰৰ গৱেষণা পত্ৰ, ১৯৮২ চনত বিনিগ আৰু ৰ'ৰাৰৰ স্কেনিং টানেলিং মাইক্ৰ'স্ক'প, ১৯৮৫ চনৰ বাকিবল আৰু পিছত কাৰ্বন নেন'টিউবৰ আৱিষ্কাৰ উল্লেখযোগ্য। শীৰ্ষ-নিম্ন আৰু নিম্ন-শীৰ্ষ পদ্ধতিৰ কথা কৈ লেখকে ইলেক্ট্ৰনিক্স, চিকিৎসা (কেঞ্চাৰ কোষ চিনাক্ত কৰিব পৰা নেন' চাবমেৰিণ আৰু নেন' ৰবট), বায়ুৰ কাৰ্বন-ডাই-অক্সাইড শুহি ল'ব পৰা কৃত্ৰিম গছৰ পাত আৰু পদুম পাতৰ আৰ্হিত স্বয়ং-পৰিষ্কাৰ কাপোৰ আদি সম্ভাৱ্য প্ৰয়োগৰ কথা কৈছে।
ভাৰতত ২০০৩ চনত কলিকতাত হোৱা আন্তঃৰাষ্ট্ৰীয় সন্মিলন আৰু বাংগালোৰৰ জৱাহৰলাল নেহৰু কেন্দ্ৰত প্ৰফেছৰ চি. এন. আৰ. ৰাওৰ তত্ত্বাৱধানত চলা গৱেষণাৰ উল্লেখ কৰি লেখকে সামৰণিত কৈছে যে বিজ্ঞানৰ অৱদান মানৱ কল্যাণৰ বাবে কেনেদৰে ব্যৱহাৰ হ'ব, সেয়া আমাৰ হাতত।
